اگر جنازوں سے لَوٹ آئے

ہم اپنے تازہ اُٹھے جنازوں سے لوٹ آئے
تو دیکھ لینا
ہمیں یہ مہلت گُلوں کے بونے میں کام آئے گی
امن شاموں کو صبح کرنے کا نام دے گی
اگر ہمارے سَروں کے کوزے نقاب پوشوں کے گرم سیسوں سے بچ کے نکلے
اگرہمارے دِلوں کی شمعیں بجھانے والے بجھا نہ پائے
تو اہلِ قریہ تمھیں بشارت ہو، تم کو دیں گے کِھلے گلابوں کے سُرخ تحفے
شبوں کی وادی میں امن قصوں کے کُہنہ گوشے
اگر جنازوں سے لوٹ آئے
ہم اپنے پھولوں کے خون چہروں کو بوسہ دےکر
صفا شہیدوں کی لالہ شفقوں کو دفن کر کے
تمھارے قریوں میں لوٹ آئے تو دیکھ لینا
ہمارے شانوں کے آسمانوں سے فاختائیں اُڑیں گی تم پر
تمھاری بستی کے روزنوں میں بنائیں گی وہ سُبک مزاجی کے آشیانے
تمھارے چھجوں کو کھول دیں گے پروں کی صورت
اگر جنازوں سے لوٹ آئے
وہی جنازے کہ صبح اُن کو اُٹھا کے لاتے ہیں قتل گاہوں کی رونقوں سے
پھر اُن کو شامِ شفق کے سائے سپرد کرتے ہیں خامشی سے
لحد کے قُبوں پہ باندھتے ہیں امام ضامن کے کالے دھاگے
یہی ہمارا ہے روز نامہ
کہ لَوٹنے پر ہمارے قاتل سُبک روی سے ہماری گردن کو کاٹتے ہیں
سو ہم لہو سے جمی ہوئی بستیوں کو اب تک نہ دھو سکے ہیں
کبھی جنازوں سے ہم سلامت پلٹ کے آئے تو دیکھ لینا
یہ بستیاں جو جمے لہو سے سیہ پڑی ہیں
یہ سبز ہوں گی
یہ خوں گرفتہ جو وادیاں ہیں یہ ابرِ نیساں سےدُھل کے تاروں
کی گردہوں گی
مگر یہ لازم ہے اہلِ قریہ کہ ہم جنازوں سے لوٹ آئیں