بانسوں کا جنگل

مَیں بانسوں کے جنگل میں ہوں جن کے نیزے بنتے ہیں
صاف ہری لچکیلی شاخوں والا جنگل بانسوں کا
جس کی رگوں میں میٹھا پانی صبحِ ازل سے جاری ہے
سبز گھنیرے پتّے اِس کے اور پتوں کے سائے ہیں
نرم زمین اور ٹھنڈی مٹی اور مٹی کی خوشبوئیں
مست خُنک مدھوش ہوائیں ہَولے ہَولے چلتی ہیں
لوگ مسافر نیل گگن کے جنگل میں آجاتے ہیں
دیکھ سرائیں خواب زدہ میٹھی نیندیں سو جاتے ہیں
لیکن صد افسوس یہاں کے کالے ناگ قیامت ہیں
شاخوں پر لٹکے رہتے ہیں اور دھرتی پر رینگتے ہیں
ڈس لیتے ہیں، کھاجاتے ہیں، سانس ہوا ہوجاتی ہے
آخر خود بھی بن جاتے ہیں سانپ کے اندرجاکرسانپ
وائے کچھ معصوم یہاں سے بچ کر بھاگنے لگتے ہیں
لیکن جنگل بانسوں کا ہے جن کے نیزے بنتے ہیں