باورا چھوکرا

وہ گاؤں گاؤں پھِر گیا گلہریوں سے گفتگو کے شوق میں
بہار آفرین سبز سبز پانیوں کے درمیاں سیاہ رنگ بیریوں کے باغ میں
وہ دیکھتا شریر طوطیوں کو نیلگوں مزاج نرم نرم کونپلوں سے کھیلتے ہوئے
گلاب اور کاسنی شراب جیسی تتلیوں کے ٹھنڈے ٹھنڈے غول کو اُڑا کے بھاگتا تھا آسماں کی بدلیوں کے ساتھ ساتھ
پَاپَلر کے اُونچے اُونچے جُھنڈ کے چہار سُو
جو گہرے گہرے پانیوں کی نہر کے کناروں پر تھے پیپلوں کے رو برو
وہ پیپلوں کے سائے سائے لمس لے کے دوڑتا نشیلے موسموں کی پربتی ہواؤں کا
وہ اس قدر نفیس تھا کہ ننگے پاؤںگُھومتا اُفق کی زرد زرد وادیوں کے قرب میں
دماغ بن کے سونگھتا تھا کچّے آنگنوں کی خوشبوئیں بہار کے شباب میں
تمام دن گزارتا تھا سردیوں کی میٹھی میٹھی دکنی سفید دھوپ میں
وہ دُور دُور کھوجتا تھا لہلہاتے سبز یوں کے کھیت کو جو دھوپ کی تمازتوں میں سبز آئنے سے تھے
خرام کر کے ہولے ہولے ہنس کی وہ چال میں سویر ے شام باجرے کے پاتروں سے چاٹتا تھا موتیوں کے نُور کو
جو آسمانی ساگروں سے آ گرے تھے پاتروں کی ناف پر
ضرور دیکھتا سنہرے سورجوں کی روشنی میں ڈوبتے منارچوں کی چوٹیوں کو غور سے
جو گاؤں کی امین مسجدوں کے حسن کا طلسم تھے
عجیب تھا وہ باولا سا چھوکرا کہ جانتا تھا بچپنے کی عمر میں ہی کوئلوں کی راگنی، کبوتروں کی بولیاں
مگر نہ جانتا تھا بات یہ کہ ایک روز آئیں گی برات لے کے شاعری کی دیویاں
بٹھائیں گی وہ دیویاں اُسے حسین ساحری کے تخت پر
جہاں وہ جگنوؤں کی روشنی میں رات بھر چُنے گا لفظ لفظ نور کے