مضافِ دریا

مضافِ دریا کے رہنے والوتمھیںہمارا سلام پہنچے
مضافِ دریا کے رہنے والوتمھارے قریوں میں زندگی ہے
تمھاری مٹی کی سبز لہریں ، تمھارے پھولوں کے رنگ گہرے
لطیف کھیتوں کے آئینوں سے نگاہیں ٹھنڈی
گھنے درختوں کی چوٹیوںپرنزولِ آیت، وحی کے ساماں
تھرکتی شاخوں پہ نوررقصاں
کھڑکتے پتوں میں گیت لرزاں
شبوں کے پہلو میں جگنوؤں کے ہیں زرد ہیرے
سحر کے دامن میں شبنموں کے سفید موتی
مضافِ دریا کے رہنے والوتمھاری گائے کے دودھ میٹھے
تمھارے ہرنوں کی نرم کھالیں تمھاری بھیڑوں کی گرم اُونیں
مضافِ دریا کے رہنے والومضافِ دریا بہشتِ روشن
یہیں پرندوں کی اونچی ڈاریںخدا کی جھیلوں میں تیرتی ہیں
کنول کے چوڑے سفید گاگر ہیں، تھال چاندی کے پانیوں میں
یہیں پہ کھیتوں میں ہل چلاتی لحیم بیلوں کی جوڑیاں ہیں
گھروں کو لوٹے تھکے کسانوں کی گرد پانی اُتارتا ہے
مضافِ دریا کے رہنے والوتمھارے دن کا شباب محنت
تمھاری شامیں سکون پرور، تمھاری راتیں ہیں خواب آور
مضافِ دریا کے رہنے والوتمھیں ہمارا سلام پہنچے