ہڈیوں کے دفینے

وہ کہتا تھا مجھ کو کنواں کھودنے کا سلیقہ نہیں ہے
وہ کہتاتھا میں نے کوئی خواب دیکھا
جہاں پر گڑھے پاٹنے والیاں بین کرکر کے روتی تھیں
اوراپنے مُردوں کو دفنا رہی تھیں
ہزاروں برس پہلے جو مر گئے اُن چمکتے سرابوں کی ریتی کو کھاکر
جہاں سے خُنک پانیوں کی طرف راستہ ہی نہیں تھا
وہ مُردے، کہ انکار کرتے رہے ایسے گہرے گڑھوں کا
جو اگلے زمانے کے مُردوں نے کھودے اُنہی کے لیے
اورتیشے چھپا کر سرابوں میں رکھے
جہاںکام آئیں کنواں کھودنے کے
مگر کام آئے نہ اُن کے وہ تیشے کنواں کھودنے کے
کہ اگلے زمانے کے مُردوں کو بھی کچھ سلیقہ نہیں تھاکنواں کھودنے کا
خبردینے والے نے مجھ کو خبردی
وہی، جو وہ اگلے زمانے کے مُردوں کودیتارہاتھا
مگر میں نصیحت کے لمحوں میں سرکش
سرابوں کے ٹیلوں پہ کتنی ہی صدیوں سے مصروف ہوںایک تیشہ لیے
اور میرے لبوں پر تہیں ریت کی جم رہی ہیں
وہی ریت، جس پر چڑھی موت کی زرد رنگت
اُدھر وہ گڑھے پاٹنے والیوں کی صدائیںقریب آگئیں
شور بڑھنے لگا بین کا
اور میں اِن سرابوں کے ٹیلوں پہ حیران
تیشے کی ہر ضرب پر ہڈیوں کے دفینے نکلنے لگے
رفتہ رفتہ مرے چار سُوڈھیریاںبن گئیں
ڈھیر بڑھتے گئے،ہڈیوں کی فصیلیں کھڑی ہوگئیں
درمیاں اُن کے آہستہ آہستہ مَیں خُود چٹخنے لگا
کڑکڑاتا ہوا ریت پر جاپڑا
اور تیشہ مرے اک طرف خامشی سے
نئے اِک گڑھے کھودنے والے کا منتظر ہے
وہ کہتاتھا میں نے کوئی خواب دیکھا