سونے کا پیڑ

میرے گھر کے کچے آنگن میں سونے کا پیڑ
پتّے خاص زمرّد جس کے اور سنہری پھول
جگمگ جگمگ سارا آنگن اور آنگن کا روپ
ساون دھو کر چمکا دیتا، جب پڑتی کچھ دُھول

سونا کھانے آ جاتے پیارے پیارے پنچھی
بُلبل، مینا، طوطی، چڑیا، کوئل، کاگ، چُکور
جاڑا آتا تو سونے کا پیڑ سیہ ہو جاتا
پوس کے پالے سے بے بس کو کرنا پڑتا زور
شام سے لیکر صبح تلک کُہرے میں جم جاتا
ظالم اور بے درد وہ موسم لیتا اُس کو گھیر
سرد ہوا کے جھونکوں کے جب زور تھپیڑے لگتے
میرے گھر میں لگ جاتا پھر تُکلوں کا اک ڈھیر