قصبے کا سٹیشن

قسمت کا رِزق کھا کر پنچھی چلے گھروں کو
سورج بھی سوگیا ہے ٹیلوں کی اوٹ لے کر
سنسان رہگزر ہے خاموش فاصلے ہیں
گم سُم ہیں شام سے ہی پیڑوں کی دو قطاریں
اب رات ہوگئی ہے ہر سمت خامشی ہے
اے اجنبی مسافر گاڑی تو جاچُکی ہے
ویران کس قدر ہے قصبے کا یہ سٹیشن؟

مُڑمُڑ کے دیکھنے کی عادت سی ہوگئی تھی
ہر بار زندگی میں یوں دیر ہم نے کی ہے

اب رات کے جناور تنہائیوں کے ساتھی
چِڑبِلوں کی چیخیں غم خوار ہیں دلوں کی
لیکن نہ جی پہ لانا اے اجنبی شناسا
ہم آج شب کے ساتھی ہم دور کے مسافر
اِک دوسرے کو اپنی سب داستاں کہیں گے
برگد کے پیڑ نیچے یوں رات کاٹ لیں گے