ہزارہ کا نوحہ

اے خون میں نہائے ہوئوں کے وارثو
مَیں تمھیں پُرسہ دینے سے قاصر ہوں
تمھارے شہیدوں کے خون کو بوسہ دینے سے عاجز ہوں
میرے اور تمھارے درمیان ایک خلیج ہے
جس کے کناروں پربھیڑیے دانت نکالے ہونک رہے ہیں
یہ بھیڑیے مکمل شناخت رکھتے ہیں
اِن کے چہروں پر نہ کوئی ماسک ہے نہ نقاب ہے
یہ بھیڑیے خاکی وردی کے جرنیل ہیں
جو بلوچستان کی ریت کو تمھارے خون سے دھو کر
ڈالروں کے عوض بیچتے ہیں
اِن کے نجس پنجے اور دانت تمھارے دلوں میں گڑے ہیں
مَیں بے کس شاعر اُنھیں نکالنے کی طاقت نہیں رکھتا
اے کوئٹہ کے ہزارہ
مجھے معاف کرنا
میں تمھارے قاتلوں کی مذمت نہیں کر سکتا
اُن کی مذمت سیکورٹی رسک ہے
اے کوئٹہ کے ہزارہ
جب بھی تمھاری حمایت میں زبان کھولتا ہوں
مجھے متعصب شیعہ ہونے کا طعنہ دیا جاتا ہے
مجھے کہا جاتا صرف ادب لکھوں
بے گناہوں کے خون پر بولنا تعصب ہے
مَیں لبرل اور ادیب ہونے کے ناطے تمھاری آواز نہیں بن سکتا
اے کوئٹہ کے ہزارہ مجھے معاف کرنا
مَیں صرف انسانوں کے قتل پر بول سکتا ہوں
اور تم شیعہ ہو
تم پر نوحہ کروں گاتو مجھے لبرلز کی طرف شیعہ ہونے کا طعنہ ملے گا
اے کوئٹہ کے ہزارہ
مَیں جانتا ہوں تم بڑی مصیبت میں ہو
مگر کیا کروں
تمھارا جرم ناقابلِ برداشت ہے
تم علیؑ والے ہو